Potahi Marae

Mihi

Topatopa ana te manu
Tau ana te titiro ki ngā au moana,
ki ngā mau o te whenua, ki ngā ara tawhito
i ahu mai ai ngā tūpuna i Wawauātea
Ki ngā takahanga i mahue iho i te hunga wairua
Ka ngaro ki Hawaiki-nui, Hawaiki-roa, Hawaiki-pāmamao
Huri noa ki te whitinga o te rā – ko Rā-nui,
ko Rā-roa, ko Rā-whakatiketike
E pāinaina ai, e āhuru ai te iwi o Te Aupōuri
I ōna pārae, ōna māniania, ōna awaawa, ōna maunga
Tāhorahora ana te huanui hei hīkoi mā tātou
Kei runga ko te whetū hei arataki
Kei raro ko te tapuwae hei whai
Pātōtō ana te manawa kia whiwhi
Ka puta ka ora, ki te wheiao ki te ao-mārama!

E ngā mana, e ngā reo, o ngā whānau, ngā hapū, otirā te iwi whānui tonu o Te Aupōuri, he mihi aroha tēnei ki a koutou katoa. Tēnā koutou katoa e ngā mātua, e ngā whaea, e rau rangatira mā, e noho mai nā i ō koutou pā kāinga, huri noa, huri noa i te ao. Ka nui te roa, ka nui te taimaha o ngā whiriwhiringa kōrero i waenganui i tō tātou iwi me te Karauna i pīkauhia ai e ngā whakatupuranga hei painga mō ngā uri whakaheke. Heoi anō rā, kua eke nei tātou ki te taumata e kitea atu ai te ara ki tua.

Koia rā ka pupū ake te aroha, i te hokinga o ngā mahara ki ngā mārohirohi i kawea ai ēnei tūmanako i roto i ngā tau kua pahika, te hunga nā rātou ngā nawe, ngā auē a te iwi i whāriki atu ai ki mua i te aroaro o Te Karauna.

E ngā hoa aroha kua whetūrangihia, kua okioki nei i ngā mahi, moe mārire mai. E kore rawa koutou e warewaretia e ngā uri. Kāti, te hunga mate ki te hunga mate – haere, haere, haere. Ki a tātou, ngā waihotanga iho a rātou mā, tēnā anō tātou katoa.

Ehara i tētahi āhua te nui o ngā mahi i mahia ai. Nō reira ka mihi ki te hunga katoa i
whakakotahi mai ai i ō koutou ngoi, i ō koutou whakaaro, ki tēnei kaupapa nui
whakaharahara. Tēnā koutou i tō koutou kaha, i tō koutou manawanui. Heoi anō
rā e te iwi, kei a koutou iāianei nā te kōrero nui – āe rānei, kāhore rānei koutou e
whakaae koia tēneki ko te huarahi mō tō tātou iwi. Nō reira, āta kōrerongia – kia
mārama ai, āta whiriwhiringia – kia tika ai, ka tuku ai i ā koutou pōti – kia mana ai.
Tēnā koutou, tēnā koutou, tēnā rā tātou katoa.